Mashahurin jami’in tsaro Mason Haynes, wanda ya shahara wajen kare fitattun taurarin duniya ciki har da iyalan Kardashian-Jenner, ya rasu yana da shekaru 52 a duniya sakamakon wani hatsarin mota.
Rahotanni sun bayyana cewa Haynes ya rasu ne a ranar 4 ga Yuli, kwanaki biyu kacal kafin cikarsa shekaru 53 da haihuwa.
Tsawon shekaru, Haynes ya kasance cikin amintattun jami’an tsaron Kim Kardashian, Kris Jenner da Kanye West, sannan ya kuma yi aiki tare da wasu fitattun taurari irin su Kevin Hart, Nicki Minaj, Charlie Puth da zakaran tseren Formula One, Lewis Hamilton.
An kuma tuna da shi a matsayin ɗaya daga cikin jami’an tsaron Kim Kardashian lokacin da aka yi mata fashi da makami a birnin Paris a shekarar 2016.
Bayan rasuwarsa, kamfanin Trojan Security UK, inda ya yi aiki, ya bayyana shi a matsayin gwarzo kuma ƙwararren jami’in tsaro wanda ya yi fice a aikinsa.
Masu shirya wani asusun tallafi ga iyalansa sun ce Mason Haynes ba jami’in tsaro kaɗai ba ne, mutum ne mai aminci, mai ba da shawara da kuma mai kyakkyawar mu’amala da mutane.
Marigayin ya rasu ya bar matarsa Fay Haynes da ‘ya’yansu biyu, Brooke da Noah.