Gwamnatin tarayya ta fara gabatar da shari’a a gaban Kotun Tarayya da ke Abuja kan wani fitaccen mai fafutuka a kafafen sada zumunta, Chidiebere, wanda aka fi sani da Justice Crack, bisa zargin aikata laifukan intanet da suka saba wa dokar Cybercrime Act.
An gurfanar da Justice Crack a gaban Mai Shari’a Joyce Abdulmalik kan tuhume-tuhume uku da aka yi masa gyara a kai, inda ya musanta dukkan zarge-zargen.
A zaman kotun da aka ci gaba da yi, shaidan farko na masu gabatar da kara, Oronto Douglas, ya bayyana cewa an sauke bidiyo da sautukan da aka samu yayin binciken wanda ake tuhuma a cikin wata flash drive tare da takardar shaidar bin ka’ida.
Sai dai lauyan wanda ake kara ya kalubalanci karbar flash drive din a matsayin hujja, yana mai cewa ba a tabbatar da ingancin abubuwan da ke cikinta ba.
Mai Shari’a Abdulmalik ta soki masu gabatar da kara saboda rashin yin cikakken neman izinin amfani da kayan da za su nuna bidiyon a kotu.
Daga baya kotun ta amince a ci gaba da belin da aka bai wa Justice Crack, bayan masu gabatar da kara ba su nuna adawa ba.
An dage sauraron karar zuwa ranar 28 ga Satumba domin ci gaba da shari’ar.
Tun da farko dai an saki Justice Crack daga tsare bayan shafe makonni a hannun hukuma, lamarin da ya jawo ce-ce-ku-ce a tsakanin jama’a.
Sojojin Najeriya sun taba bayyana cewa an tsare shi ne bayan wasu bidiyoyi da ya wallafa da ake zargin sun nuna sojoji suna korafi kan matsalolin jin dadinsu da abinci.
Daga bisani aka mika shi ga hukumomin farar hula domin gurfanar da shi bisa zargin aikata laifukan intanet da tayar da hankalin jama’a.