Wasu ‘yan takarar gwamna uku na jam’iyyar All Progressives Congress (APC) a jihar Yobe sun nuna rashin amincewarsu da fitowar Baba Malam Wali a matsayin dan takarar maslaha na jam’iyyar gabanin zaben gwamna na 2027, inda suka bukaci a gudanar da sahihin zaben fidda gwani.
‘Yan takarar da suka nuna rashin amincewa sun hada da tsohon Darakta Janar na Hukumar Ba da Agajin Gaggawa ta Kasa (NEMA), Mustapha Maihaja; tsohon dan majalisa, Bashir Machina; da Kashim Musa Tumsah.
Sun bayyana cewa duk wani yunkuri na kakaba dan takara ga mambobin jam’iyya ba tare da bin doka ba zai saba wa dokar zabe da kuma kundin tsarin APC.
Da yake magana a Damaturu a madadin kungiyar da aka fi sani da G-3, Tumsah ya ce tsarin maslaha da ake kokarin aiwatarwa bai bi matakan da suka dace ba.
A cewarsa, kungiyar na da niyyar tabbatar da cewa an bi sahihin tsarin dimokuradiyya wajen zaben dan takarar gwamna.
“Batun maslaha bai tafi yadda ya kamata ba. Tunda ba a bi tsarin da aka shimfida ba, muna ganin wannan tsari ya gaza,” in ji Tumsah.
Ya kara da cewa ‘yan takarar na da damar neman zaben fidda gwani kai tsaye kamar yadda dokar zabe da ka’idojin APC suka tanada.
Tumsah ya zargi wasu jiga-jigan jam’iyyar da yunkurin kakaba dan takara maimakon barin mambobi su zaba cikin ‘yanci ta hanyar kuri’a.
“Abin da muke so shi ne a gudanar da sahihin zabe inda ‘yan APC za su zabi wanda suke so da kansu,” in ji shi.
Ya gargadi cewa za su iya kalubalantar sakamakon duk wani zabe idan ba a bi doka da ka’ida ba, amma ya jaddada cewa za su marawa duk wanda ya fito ta sahihin hanya baya.
Shi ma Bashir Machina ya bukaci magoya bayan APC a jihar da su guji duk wani yunkuri na tsayar da dan takara ba tare da tuntubar mambobi ba.