Sanata mai wakiltar Kwara Central, Saliu Mustapha, ya musanta cewa yana cikin zaben fidda gwani na Sanata na jam’iyyar All Progressives Congress (APC), duk da wata takarda da ke yawo a kafafen sada zumunta da ke nuna cewa an amince da shi ya shiga takarar.
Takardar da ta bazu a yanar gizo ta nuna cewa Gwamna AbdulRahman AbdulRazaq yana a matsayi na 17 a jerin ‘yan takarar jam’iyyar, yayin da Saliu Mustapha aka saka shi a matsayi na 18.
Sai dai a martaninsa, Mustapha ya bayyana takardar a matsayin “ta bogi”, kamar yadda mai magana da yawunsa, Nasif Solagberu, ya bayyana a wata sanarwa.
Sanarwar ta ce: “Don kauce wa shakku, Sanata Saliu Mustapha ya sayi fom ɗin takarar Gwamna a ƙarƙashin APC domin zaben 2027. Ya yi hakan a fili, tare da sanin kowa, ciki har da shugabannin jam’iyya da magoya baya.”
Sanarwar ta ƙara da cewa Mustapha bai taɓa sayen fom na takarar Sanata ba, kuma bai shiga ko wani tsarin tantance ‘yan takarar Sanata ba.
“Ba mu taɓa ganin ko shiga wani tsarin tantance shi a matsayin ɗan takarar Sanata ba,” in ji sanarwar.
Ya kuma kalubalanci duk wanda ke da hujja akasin hakan da ya fito da ita fili.
Haka kuma ya bukaci jama’a da su yi watsi da jerin sunayen da ake yadawa, yana mai cewa wasu masu son tayar da rikici ne ke yaɗa labarin ƙarya domin rikita jam’iyyar APC.