Ga AbdulHameed Ayodeji, fashion ba wai dinki da kayan sawa kawai ba ne; wata babbar hanya ce ta bayyana kai, al’adu da kuma asali.
Ayodeji, wanda ya kammala karatun Kimiyyar Siyasa da Harkokin Kasa da Kasa a Jami’ar Crawford da ke Igbesa, jihar Ogun, sannan kuma ya samu takardar digiri na gaba (PGD) a fannin Mass Communication daga Nigerian Institute of Journalism, na ci gaba da kafa sunansa a cikin masana’antar fashion mai cike da gasa a Najeriya.
A matsayinsa na wanda ya kafa kuma Babban Mai Kirkira na kamfanin Asotiayé, Ayodeji na sake fasalta fashion a matsayin wata hanya ta ba da labari, kare al’adu da kuma bunkasa dorewar sana’a (sustainability).
A cewarsa, tushen tafiyarsa yana da alaka da zurfin sha’awa wajen hada al’adu da salon zamani.
“A zuciyar Asotiayé akwai bayar da labari ta hanyar zane,” in ji shi.
“Muna kirkirar kayayyaki da suka samo asali daga al’adun Afirka amma cikin salo na zamani. Kowanne zane yana dauke da tarihin mutum, tasirin al’umma da kuma tarihi. A gare mu, ba wai kawai alama ba ce, muna girmama baya ne tare da gina makomar fashion na Afirka.”
Tun yana karami, Ayodeji ya taso cikin al’umma mai cike da al’adu da fasaha, wanda hakan ya sa ya fara nuna sha’awa ga zane da kirkira tun da wuri. Wannan tasiri ne daga baya ya zama ginshikin hangen nesansa na kirkira.
A yau, yana daga cikin sabbin matasa masu tasowa da ke amfani da basirarsu wajen hada al’adu da zamani domin samar da salo mai ma’ana a Najeriya da ma nahiyar Afirka baki daya.