Tawagar Ingila za ta fara yunkurinta na kawo karshen shekaru 60 ba tare da lashe babban kofi ba yayin da za ta kara da Croatia a wasan farko na gasar Kofin Duniya ta 2026 ranar Laraba.
A gefe guda kuma, fitaccen dan wasan Portugal, Cristiano Ronaldo, na dab da kafa tarihi ta hanyar buga gasarsa ta shida a Kofin Duniya, abin da zai daidaita tarihin da Lionel Messi ya kafa.
Ronaldo mai shekaru 41 zai jagoranci Portugal a wasan da za su fafata da Jamhuriyar Dimokuradiyyar Congo a Houston, yayin da tawagarsa ke kokarin lashe Kofin Duniya karo na farko a tarihinta.
Sai dai babban kalubalen da Ronaldo ke fuskanta shi ne yadda tsohon abokin hamayyarsa, Lionel Messi, ya haskaka a ranar Talata inda ya zura kwallaye uku (hat-trick) a ragar Argentina, tare da daidaita tarihin mafi yawan kwallaye a gasar Kofin Duniya.
Messi ya zama dan wasa na farko da ya buga gasar Kofin Duniya sau shida, yayin da kwallayensa 16 suka kai shi matakin da tsohon dan wasan Jamus, Miroslav Klose, ya kafa.
A bangaren Ingila kuwa, kyaftin Harry Kane ya bukaci takwarorinsa da su taka leda cikin kwanciyar hankali da cikakken kwarin gwiwa yayin karawar da za su yi da Croatia.
Kane ya ce Ingila na da babbar dama ta lashe kofin bana, musamman bayan kusantar da ta yi a gasannin baya.
“Wannan na daga cikin mafi kyawun damar da muke da ita wajen lashe Kofin Duniya. Kowa na da sha’awar fara gasar da kyau da kuma nuna cewa za mu iya kaiwa mataki mai nisa,” in ji Kane.
A wasu wasannin ranar Laraba, Ghana za ta kara da Panama a Toronto a rukuni na L, yayin da Uzbekistan, wadda ke buga gasar Kofin Duniya karo na farko, za ta fafata da Colombia a birnin Mexico.
A ranar Talata kuma, Faransa ta fara gasarta da nasarar doke Senegal da ci 3-1, inda Kylian Mbappe ya zura kwallaye biyu, yana nuna cewa har yanzu yana cikin sahun manyan ‘yan wasan da za su iya yin tasiri a gasar bana.
Masoya kwallon kafa a duniya na ci gaba da sa ido kan fafatawar da ke tsakanin manyan taurari irin su Messi, Ronaldo, Mbappe da Kane yayin da gasar Kofin Duniya ta 2026 ke kara daukar zafi.