Shahararren jarumin fina-finan Najeriya, Daniel Etim-Effiong, ya bayyana labarin yadda mahaifinsa ya tsira daga hukuncin kisa bayan an zarge shi da hannu a shirin juyin mulki a zamanin mulkin soja.
A cikin wata hira da ya yi da Diary of a Naija Girl, jarumin ya ce mahaifinsa, Moses Effiong, wanda tsohon Laftanar Kanar ne a soja mai ritaya, an tsare shi lokacin da Daniel ke da shekara ɗaya kacal a duniya.
Ya bayyana cewa tsarewar ta biyo bayan zargin shirin juyin mulkin Mamman Vatsa a zamanin mulkin soja na Janar Ibrahim Badamasi Babangida.
A cewarsa, mahaifinsa ba ya cikin waɗanda suka shirya juyin mulkin, amma an danganta shi da lamarin ne bayan wani abokin aiki ya ambace shi a lokacin bincike.
Daniel ya ce yayin da aka yanke wa wasu da ake zargi hukuncin kisa kuma aka harbe su a gidan yarin Kirikiri, mahaifinsa ya tsira daga wannan hukunci a abin da ya kira “al’ajabi”.
Wannan labarin ya bayyana wani bangare na tarihin rayuwar danginsa da kuma irin wahalhalun da suka fuskanta a lokacin rikicin siyasar soja a Najeriya.