Kocin ƙasar Croatia Zlatko Dalić ya bayyana kwarin gwiwarsa cewa kyaftin ɗin tawagarsa Luka Modrić zai samu lafiya cikin lokaci domin jagorantar ƙasarsa a gasar FIFA World Cup mai zuwa, duk da raunin da ya samu a fuska.
Modrić ya samu karayar kashin kunci (cheekbone) ne bayan karo da kai yayin wasan da AC Milan ta buga da Juventus wanda ya tashi babu ci. Binciken likitoci ya tabbatar da cewa ya samu rauni mai rikitarwa a bangaren kashin fuska na hagu (zygomatic bone).
Rahotanni daga BBC Sport sun bayyana cewa an yi masa tiyata cikin nasara, kuma kulob ɗinsa AC Milan ya tabbatar da cewa aikin ya tafi daidai, duk da cewa ba a fitar da cikakken lokacin dawowarsa ba.
A yanzu haka, ana sa ran Modrić zai yi jinyar sauran wasannin Serie A yayin da AC Milan ke fafutukar samun gurbin shiga Champions League.
Duk da wannan rauni, kocin Croatia Dalić ya ce yana da kwarin gwiwa cewa Modrić zai murmure kafin gasar da za a fara a ranar 11 ga watan Yuni, inda Croatia za ta fara wasanta da Ingila a ranar 17 ga Yuni.
“Na yi imanin zai yi duk abin da zai iya don ya kasance cikin shiri. Za mu ba shi cikakken goyon baya,” in ji Dalić.
Ya ƙara da cewa yana da tabbacin tsarin murmurewar zai tafi daidai, kuma Modrić zai jagoranci tawagar a wata babbar gasa kamar yadda ya saba.
Modrić, wanda ya shahara a matsayin ɗaya daga cikin manyan ‘yan wasan Croatia, ana sa ran zai taka muhimmiyar rawa idan ya warke cikin lokaci.