Wani sojan ruwa na Amurka da ke aiki a tsibirin Okinawa da ke kudancin Japan, an kama shi bisa zargin kashe wata ’yar kasar Japan mai shekaru 39.
’Yan sandan Japan sun ce lamarin ya faru ne a wani otal da ke birnin Naha ranar Asabar, inda ake zargin sojan ya kashe matar tare da kwace jakarta.
Kakakin ’yan sandan yankin ya tabbatar wa kamfanin dillancin labarai na AFP cewa an kama wanda ake zargin yayin da bincike kan lamarin ke ci gaba.
Japan Ta Bukaci Amurka Ta Ba Da Hadin Kai
Firaministar Japan, Sanae Takaichi, ta ce gwamnatin kasar ta gabatar da korafi ga hukumomin Amurka kan lamarin.
Ta bayyana kisan a matsayin wani mummunan laifi, tare da neman Amurka ta ba da cikakken hadin kai wajen binciken lamarin.
Takaichi ta kuma bukaci Amurka da ta kara tsaurara ladabtar da jami’an sojojinta da ke Japan tare da daukar matakan da za su hana sake faruwar irin wannan lamari.
Shi ma jakadan Amurka a Japan, George Glass, ya ce ya tuntubi ma’aikatar harkokin wajen Japan da gwamnan Okinawa, inda ya mika sakon ta’aziyya tare da yin alkawarin cewa Amurka za ta ba da cikakken hadin kai ga binciken.
Rahoton CCTV Ya Taimaka Wajen Bincike
Kafofin yada labaran Japan, ciki har da NHK, sun ruwaito cewa hotunan kyamarar CCTV da aka dauka kusa da wurin da lamarin ya faru sun nuna wani mutum dan kasar waje yana shiga wani daki tare da wata mata, daga bisani kuma ya fito dauke da kayanta.
Rahotanni sun ce ’yan sanda sun gano wani mutum mai shekaru 20 wanda ya yi kama da wanda aka gani a hotunan CCTV, inda suka nemi ya bi su zuwa ofishin ’yan sanda.
Daga nan ne aka kama shi bisa zargin kisan. Sai dai rahotannin sun ce wanda ake zargin ya musanta aikata laifin.
Dan’uwan matar da aka kashe ya bayyana cewa iyalinsu sun shiga cikin babban bakin ciki sakamakon mutuwar ’yar uwarsu.
Matsalar Sojojin Amurka A Okinawa
Amurka na da kusan sojoji 54,000 da aka jibge a Japan, yawancinsu a Okinawa.
Tsawon shekaru, laifukan da ake zargin wasu jami’an sojojin Amurka da aikatawa sun kasance wani batu da ke haifar da damuwa da zanga-zanga a Okinawa, saboda tsibirin na dauke da kusan kashi 70 cikin 100 na sansanonin sojin Amurka da ke Japan.
Ministan Tsaron Japan, Shinjiro Koizumi, ya ce abubuwan da suka shafi jami’an sojin Amurka na haifar da fargaba a tsakanin al’ummar yankin, yana mai cewa bai kamata a bar irin wadannan abubuwa su ci gaba da faruwa ba.
A cewar rahoton jaridar Yomiuri Shimbun, an kama kusan jami’an sojin Amurka 6,000 tun bayan da aka mayar da Okinawa karkashin ikon Japan daga Amurka a shekarar 1972.
Rahoton ya kuma ce a shekarar 2024 kadai, an samu kama mutane 80, wanda shi ne adadi mafi yawa cikin shekaru 20