Cibiyar Nazarin Manufofi da Dabarun Ƙasa ta Najeriya, NIPSS, ta sanar da dage babban taronta na ƙasa da baje kolin da za a mayar da hankali kan Orange Economy, daga watan Oktoba zuwa watan Disamba na shekarar 2026.
Tun farko, an shirya gudanar da taron daga ranar 6 zuwa 8 ga Oktoba, 2026, a Wole Soyinka Centre for Culture and Creative Arts, wato tsohon National Theatre da ke Legas.
Sai dai a wata sanarwa da masu shirya taron suka fitar ranar Laraba, sun bayyana cewa yanzu za a gudanar da taron daga ranar 8 zuwa 10 ga Disamba, 2026, a Admiralty Event Centre, Ahmadu Bello Way, Victoria Island, Lagos.
Masu shirya taron sun ce an ɗage shi ne domin samun ƙarin lokaci na inganta shirin taron, faɗaɗa yawan masu ruwa da tsaki da za su halarta, tare da ƙara tasirin taron da sakamakon da ake sa ran samu.
Taron, wanda NIPSS ta shirya tare da haɗin gwiwar Bruit Costaud Government Affairs Et Al Limited, ana sa ran zai haɗa gwamnati, masu tsara manufofi, masu zuba jari, shugabannin masana’antar ƙirƙire-ƙirƙire da al’adu, ’yan kasuwa, masana, abokan hulɗar ci gaba da sauran masu ruwa da tsaki.
Menene Orange Economy?
Orange Economy na nufin harkokin tattalin arziki da suka dogara da ƙirƙire-ƙirƙire, al’adu da kuma haƙƙin mallakar fasaha.
Wannan fanni ya haɗa da masana’antun fina-finai, kiɗa, kayan sawa, wallafe-wallafe, tallace-tallace, zane-zane, fasahar gani, nishaɗi da sauran harkokin al’adu.
A Najeriya, wannan fanni na ƙara samun muhimmanci a cikin shirye-shiryen faɗaɗa hanyoyin samun kuɗin shiga da tattalin arziki, musamman ta fuskar samar da ayyukan yi, jawo zuba jari da bunƙasa ƙirƙire-ƙirƙire.
Sai dai masana’antar na fuskantar wasu ƙalubale da suka haɗa da ƙarancin samun jari, satar fasaha, rashin isassun kayan aiki da ababen more rayuwa, da kuma ƙarancin bayanan da za su taimaka wajen tsara manufofi.
Masu shirya taron sun ce babban taron NIPSS zai samar da wata dama ga masu ruwa da tsaki domin tattauna hanyoyin da masana’antun ƙirƙire-ƙirƙire da al’adu za su ƙara bayar da gudunmawa wajen bunƙasa tattalin arzikin Najeriya.
Sun kuma bayyana cewa taron zai mayar da hankali kan batutuwan da suka shafi faɗaɗa tattalin arziki, samar da ayyukan yi, ƙirƙire-ƙirƙire, zuba jari da kuma ci gaba mai ɗorewa.
Masu shirya taron sun gode wa abokan hulɗa, masu gabatar da jawabai, masu baje kolin kayayyaki, masu ɗaukar nauyi, kafafen yaɗa labarai da waɗanda suka riga suka yi rajistar halarta.
Sun kuma nemi afuwar duk wani rashin jin daɗi da sauyin lokaci da wurin taron zai iya haifarwa, tare da kira ga masu ruwa da tsaki da su ci gaba da bayar da goyon baya.
A cewar masu shirya taron, ana sa ran taron zai zama wata muhimmiyar dama ta gudanar da tattaunawa ta ƙasa kan yadda za a ƙara amfani da damar da ke cikin Orange Economy wajen bunƙasa Najeriya.
Sabon jadawalin taron shi ne 8 zuwa 10 ga Disamba, 2026, a Admiralty Event Centre, Victoria Island, Lagos.