Ƙungiyar Manyan Ma’aikatan Jami’o’in Najeriya, SSANU, ta bai wa gwamnatin tarayya wa’adin kwanaki 14 da ta saki kuɗaɗen aiwatar da yarjejeniyar da suka cimma a shekarar 2026 tare da biyan basussukan albashin da ake bin ma’aikata.
Ƙungiyar ta yi barazanar fara yajin aikin gama-gari kuma mara ƙayyadadden lokaci idan gwamnati ta gaza cika buƙatunta cikin wa’adin da ta sanya.
SSANU ta sanar da wannan matsaya ne a ƙarshen taron Majalisar Zartarwarta ta Ƙasa, NEC, karo na 56, wanda aka gudanar a Jami’ar Uyo da ke jihar Akwa Ibom.
A cikin wata sanarwa da Shugaban Ƙungiyar na Ƙasa, Comrade Mohammed Ibrahim, ya sanya wa hannu, SSANU ta ce har yanzu ba a kammala aiwatar da yarjejeniyar FGN/SSANU ta shekarar 2026 ba, duk da cewa an rattaba hannu kan yarjejeniyar a ranar 29 ga Yuni.
Ƙungiyar ta ce yarjejeniyar wadda ta fara aiki daga ranar 1 ga Janairu, 2026, tana fuskantar rashin daidaito wajen aiwatar da ita a jami’o’in ƙasar.
Daga cikin manyan buƙatun ƙungiyar akwai a biya dukkan basussukan da suka taso daga tsarin albashi na Consolidated University Teaching and Tertiary Institutions Salary Structure, CONTTA, tun daga ranar 1 ga Janairu, 2026.
SSANU ta kuma buƙaci a biya ma’aikata albashin watanni biyu da aka riƙe a lokacin yajin aikin shekarar 2022, da kuma bashin shekara guda da ya samo asali daga ƙarin albashi na kashi 25 da kashi 35 cikin 100.
Ƙungiyar ta bayyana cewa wasu jami’o’i sun fara aiwatar da tsarin CONTTA ne ta hanyar amfani da kuɗaɗen da suke samarwa da kansu, saboda rashin samun kuɗaɗen kai tsaye daga gwamnatin tarayya.
Ta kuma bukaci jami’o’in da har yanzu ba su fara aiwatar da tsarin ba su gaggauta yin hakan domin tabbatar da zaman lafiya tsakanin ma’aikata da hukumomin jami’o’i.
SSANU ta kuma nemi a aiwatar da yarjejeniyar yadda ya kamata a jami’o’in jihohi, tana mai cewa bai kamata a samu bambancin yadda ake kula da ma’aikata a sassa daban-daban na tsarin jami’o’in Najeriya ba.
Ƙungiyar ta ce idan gwamnatin tarayya ta kasa cika buƙatunta cikin kwanaki 14, za ta tilasta mata komawa yajin aikin gama-gari, cikakke kuma mara ƙayyadadden lokaci ba tare da ƙarin sanarwa ba.
Sai dai SSANU ta ce har yanzu tana buɗe ƙofa ga tattaunawa da gwamnati domin samun mafita da kuma tabbatar da zaman lafiya a fannin ilimi.
Baya ga batun albashi, ƙungiyar ta kuma bukaci ƙarin kuɗaɗen gudanar da jami’o’i, inganta gine-gine da kayayyakin more rayuwa, tare da ƙarfafa tsaro a cibiyoyin ilimi.
SSANU ta kuma yi watsi da amfani da virtual accreditation, wato tantance jami’a ta hanyar yanar gizo, a matsayin madadin zuwa jami’a domin duba gine-gine, kayan aiki da shirye-shiryen karatu da ido.
Haka kuma, ƙungiyar ta nuna adawa da duk wani shiri na mayar da King’s College, Lagos, ko wasu makarantun gwamnati mallakar jama’a zuwa hannun masu zaman kansu, tana mai cewa ya kamata a kare mallakar gwamnati da kuma damar jama’a samun ilimi cikin sauƙi.
SSANU ta kuma bayyana damuwarta kan matsalar tsaro, hauhawar farashin abinci da tsadar rayuwa, inda ta bukaci gwamnati ta kare manoma da cibiyoyin ilimi tare da ɗaukar matakan da za su taimaka wajen dawo da ƙarfin sayen ma’aikata.
Ƙungiyar ta ce za ta ci gaba da neman mafita ta hanyar tattaunawa, amma za ta yi amfani da hanyoyin da doka ta tanada wajen kare haƙƙoƙin mambobinta idan gwamnati ta kasa cika alkawuran da ta ɗauka.