Wata kotu a Kenya ta bayar da umarnin dakatar da wasu ayyuka a wurin da ake shirin gina sabuwar matatar man fetur ta Dangote a Lamu, Kenya, har zuwa ranar 14 ga Oktoba, 2026, lokacin da za a sake sauraron shari’ar.
Lauyan masu shigar da ƙara, George Wakahiu, ya shaida wa Bloomberg cewa hukuncin kotun na nufin ba za a fara aikin gina matatar ba kafin ranar da kotun za ta sake zama.
Masu ƙarar sun yi zargin cewa aikin matatar zai tilasta korar wasu mutane daga filayensu, tare da lalata kadarorinsu, yayin da kuma ba a gabatar da wani tsarin sake tsugunar da mutanen da abin ya shafa ba.
Sun kuma yi zargin cewa Dangote da hukumomin Kenya ba su cika wasu sharuddan dokokin muhalli na ƙasar ba, musamman batun gudanar da cikakken binciken tasirin muhalli kafin fara manyan ayyuka.
Sai dai Dangote Group ta bayyana cewa kotun ba ta dakatar da bikin aza harsashin ginin matatar kai tsaye ba. Kamfanin ya ce hukuncin ya shafi ayyukan da za a gudanar a wurin har zuwa lokacin sauraron shari’ar.
Rahoton ya ce an shirya bikin aza harsashin ginin matatar a ranar 30 ga Satumba, bayan Shugaban Kenya, William Ruto, ya bayyana cewa gwamnatinsa na gaggauta wasu matakan gudanarwa domin a samu damar fara aikin ba tare da tsaiko ba.
Matatar da ake shirin ginawa a Lamu na da ƙarfin tace ganga 700,000 na ɗanyen mai a kowace rana. Aliko Dangote ya kuma bayyana cewa sabuwar matatar za ta kasance mafi girma fiye da matatar Dangote da ke Najeriya.
Shugaba Ruto ya bayyana aikin a matsayin wani babban shiri na yankin Gabashin Afirka, wanda ake sa ran zai ƙara ayyukan masana’antu, samar da guraben aiki da kuma inganta ƙwarewar ma’aikata a yankin.