Saudiya Ta Zargi Houthis da Nufin Kai Hari Makka, Ta Ce Tsaron Masallatan Harami ‘Jan Layinmu Ne’

Gwamnatin Saudi Arabia ta zargi mayakan Houthi na Yemen da kokarin kai hari zuwa birnin Makka, lamarin da ya janyo kakkausar suka daga Saudiya da wasu ƙasashen Musulmi.
A ranar Laraba, kawancen da Saudiya ke jagoranta wajen yakar Houthis ya ce jami’an tsaron ƙasar sun dakile wani jirgin sama mara matuki da ake zargin yana kan hanyarsa zuwa Makka, birnin da ke karɓar miliyoyin mahajjata daga sassan duniya a kowace shekara.
Sai dai Houthis sun musanta zargin, inda wani jami’in kungiyar, Hazem al-Assad, ya bayyana ikirarin Saudiya a matsayin “ƙarya” da aka sha amfani da ita a baya.
A cewar rahotannin, Saudiya ta kuma gargadi Houthis cewa tsaron Makka da Madina, da kuma lafiyar mahajjata, ba abin tattaunawa ba ne, inda kawancen ya ce za su ɗauki matakan da suka dace idan aka ci gaba da samun barazana ga wuraren ibada.
Kungiyar Hadin Kan Kasashen Musulmi ta OIC, wadda ta ƙunshi ƙasashe Musulmi 57, ta kuma yi Allah-wadai da hare-haren da aka ruwaito a Makka da yankin Madina.
Wannan sabon rikici ya zo ne yayin da yakin Yemen ke sake tsananta bayan shekaru na samun sassaucin fada. Rahotanni sun ce Houthis sun ƙara samun iko a wasu yankunan Yemen, ciki har da yankunan da ke kusa da gabar Bahar Maliya da mashigar Bab al-Mandab, wadda ke da matukar muhimmanci ga zirga-zirgar jiragen ruwa tsakanin Bahar Maliya da Tekun Aden.
Saudiya da Masar sun yi kira da a tabbatar da tsaro da ‘yancin zirga-zirgar jiragen ruwa a mashigar Hormuz da Bab al-Mandab, yayin da Qatar ta yi gargadin cewa rufe mashigar Bab al-Mandab na iya haifar da mummunan tasiri ga tattalin arzikin duniya.
Hare-haren da ake dangantawa da Houthis kan hanyoyin ruwa da kayayyakin makamashi sun kuma kara tayar da hankalin kasuwannin mai na duniya, yayin da Saudiya ke ci gaba da daukar matakan soji kan kungiyar.
A halin yanzu, rikicin Yemen na ci gaba da haifar da matsalar jin kai, inda Majalisar Dinkin Duniya ta ce dubban mutane sun riga sun bar gidajensu sakamakon sabbin fadan da suka barke tun farkon watan Satumba.