Wani jigo a jam’iyyar African Democratic Congress (ADC), Okai Austin, ya yi kira ga Ministan Abuja, Nyesom Wike, da ya gargadi Shugaban Karamar Hukumar Kuje, Samuel Shekwolo, kan kalaman da ya bayyana a matsayin masu haddasa rarrabuwar kai da kuma ƙara zafafa rikicin siyasa a yankin.
Okai, wanda kuma mai fafutukar kare hakkin bil’adama ne, ya yi wannan kira ne a wata sanarwa da ya fitar ranar Laraba a Abuja.
Ya ce hakan ya biyo bayan wani bidiyo da ya yadu a kafafen sada zumunta, inda ake zargin Shugaban Kuje da yin barazanar bibiyar tare da kai hari ga mutanen da ke sukar sa a kafafen sada zumunta.
An kuma zargi Shekwolo da gargadin mazauna yankin da ba sa goyon bayan jam’iyyar APC da su bar yankin.
Da yake mayar da martani kan kalaman, Okai ya bayyana su a matsayin “marasa dacewa kuma masu matukar hadari,” yana gargadin cewa irin waɗannan kalamai na iya haifar da tashin hankali idan hukumomin da abin ya shafa ba su ɗauki mataki cikin gaggawa ba.
Ya ce Abuja gida ce ga ’yan Najeriya daga sassa daban-daban na ƙasar, har ma da al’ummar ƙasa da ƙasa, don haka bai kamata a bar wani mutum ya ƙara dagula zaman lafiya da fahimtar juna ba.
Okai ya bukaci shugaban Kuje ya yi taka-tsantsan da kalamansa tare da mayar da hankali wajen inganta zaman lafiya, haƙuri da kuma haɗin kan mazauna yankin, ba tare da la’akari da jam’iyyar siyasar da suke goyon baya ba.
Ya kuma jaddada cewa jami’an gwamnati, musamman shugabannin ƙananan hukumomi da ke da alhakin jagorantar al’umma a matakin ƙasa, ya kamata su kula da irin kalaman da suke yi domin kada su zama sanadin rarrabuwar kai.
A cewarsa, kasancewa shugaban ƙaramar hukuma bai kamata ya hana mutum nuna ladabi da kwarewar shugabanci ba.
Ya ce Kuje an san shi da zaman lafiya da haƙuri, don haka ya kamata shugabancinsa ya nuna irin waɗannan dabi’u.
Okai ya kuma yi kira ga hukumomin da abin ya shafa da su duba kalaman da ake dangantawa da Shekwolo tare da tabbatar da cewa zababbun shugabanni da naɗaɗɗun jami’ai suna aiki wajen kare zaman lafiya da doka.
Ya ce bai kamata bambancin ra’ayin siyasa ya zama dalilin lalata zaman lafiya da zaman tare tsakanin mazauna Abuja ba.
Bugu da ƙari, ya bukaci Shekwolo ya yi koyi da shugabannin siyasa da suka shahara wajen warware matsaloli ta hanyar tattaunawa da lumana, inda ya ambaci tsohon Sanatan Abuja, Philip Aduda, a matsayin misali.
Okai ya kuma roƙi Wike da sauran hukumomin da abin ya shafa da su shiga tsakani tun kafin lamarin ya ƙara tsananta, yana mai cewa shugabanci na gari yana buƙatar natsuwa, haƙuri da kuma mutunta ra’ayoyin da ska bambanta.