Tsohon Mataimakin Darakta na Hukumar Tsaro ta DSS, Dennis Amachree, ya yi ikirarin cewa tsohon Shugaban Mulkin Soja na Najeriya, Janar Sani Abacha, ya rasu ne sakamakon bugun zuciya (cardiac arrest) yayin wata ganawa ta sirri da wata mata, ba saboda cin tuffar da aka sanya wa guba ba kamar yadda aka dade ana yadawa.
Amachree ya bayyana hakan ne a cikin sabon littafinsa mai suna “DSS @40: My Journey Behind the Shield”, inda ya ce lamarin ya faru ne a fadar shugaban kasa da ke Abuja da misalin karfe 4:05 na asubahin ranar da Abacha ya rasu a watan Yunin 1998.
A cewarsa, matar da ke tare da Abacha ta firgita bayan ta lura ya daina motsi kuma ba ya numfashi. Ya ce matar ta nemi a mayar da ita otal kafin jami’an tsaro su gano abin da ya faru.
Amachree ya kara da cewa daga baya DSS ta gano matar a Legas tare da yi mata tambayoyi, inda ta ce:
“Ban kashe shi ba, ya mutu ne yana kaina.”
Ya bayyana cewa bayanin matar ya saba da jita-jitar da aka shafe shekaru ana yadawa game da mutuwar Abacha, yana mai cewa wannan shi ne abin da ya faru a zahiri.
Sai dai har yanzu babu wata sanarwa ta hukuma da ta tabbatar da wannan sabon bayani, kuma batun mutuwar Janar Sani Abacha na ci gaba da kasancewa cikin muhawara da ra’ayoyi mabambanta.