Hukumar Kwastam ta Najeriya (NCS) ta mika kwantena tara dauke da haramtattun kwayoyi, magungunan jabu, wadanda suka kare da kuma kayayyakin magunguna da aka haramta shigowa da su, masu kimar harajin kwastam ta Naira biliyan 53.391, ga Hukumar Yaki da Sha da Fataucin Miyagun Kwayoyi (NDLEA) da Hukumar NAFDAC.
Da yake jawabi yayin bikin mika kayan a Apapa ranar Laraba, Kwanturola Janar na Kwastam, Adewale Adeniyi, ya ce nasarar kamen ta samo asali ne daga ingantaccen aikin tattara bayanan sirri da hadin gwiwa tsakanin hukumomin tsaro domin kare lafiyar al’umma da tsaron kasa.
A cewarsa, jami’an Kwastam na Yankin Apapa ne suka gano kayayyakin bayan gudanar da binciken sirri, amfani da na’urar tantance kaya (scanner), binciken hannu da kuma hadin gwiwa da jami’an NDLEA.
Adeniyi ya ce wannan nasara ta sake nuna kudirin hukumar na kare iyakokin Najeriya da dakile shigo da miyagun kwayoyi da sauran haramtattun kayayyaki.
Daga cikin abubuwan da aka kama akwai kwantena mai kafa 40 mai lambar CAAU7569127, wanda ke dauke da kunshi 3,639 na tabar wiwi (Cannabis sativa) masu nauyin kilogiram 1,819.5, inda aka boye su tare da motoci uku da kayan gyaran motoci.
Haka kuma, an kama wani kwantena mai kafa 40 mai lambar HAMU3246311, dauke da kunshi 9,918 na tabar wiwi masu nauyin kusan tan 4.95, wadanda aka boye tare da motoci biyu da kayayyakin gida.
Hukumar Kwastam ta ce za ta ci gaba da hada kai da NDLEA da NAFDAC domin yaki da fataucin miyagun kwayoyi da shigo da haramtattun kayayyaki zuwa cikin Najeriya.