FIFA ta fitar da sabon jadawalin Goalkeeper Power Rankings na gasar Kofin Duniya ta 2026, inda kyaftin din Cape Verde, Vozinha, da kyaftin din Afirka ta Kudu, Ronwen Williams, suka kasance cikin fitattun masu tsaron raga bayan kammala matakin rukuni.
Jadawalin, wanda Aramco ke tallafawa, yana tantance masu tsaron raga ne ta fannoni biyu: In Possession, wato yadda mai tsaron raga ke taka rawa wajen gina wasa da rarraba ƙwallo, da kuma Defending the Goal, wanda ke auna ƙwarewarsa wajen hana ƙwallaye da ceton raga.
Mai tsaron ragar Paraguay, Orlando Gill, ne ya kasance kan gaba a fannin Defending the Goal, bayan bajintar da ya nuna, ciki har da taimakawa ƙasarsa wajen doke Jamus a bugun fenariti a zagayen ‘Round of 32’.
A bangaren In Possession, Vozinha ne ya zo na farko da maki 8.03, bayan ya kammala 91 cikin 130 na fasfofinsa tare da yin 34 na nasarar karya layin abokan hamayya.
Haka kuma ya zo na takwas a fannin kare raga da maki 7.33, bayan ya ceci ƙwallaye 9 cikin 11 da aka harba masa, yayin da Cape Verde ta zura mata ƙwallaye biyu kacal a matakin rukuni.
Kyaftin din Afirka ta Kudu, Ronwen Williams, ya zo na biyu a fannin In Possession da maki 7.64, inda ya kammala 102 cikin 151 na fasfofinsa, tare da yin 24 na karya layin wasa da kuma 16 na dogayen fasfofi zuwa bayan ‘yan adawa.
Williams ya kuma ceci ƙwallaye shida a matakin rukuni, sannan FIFA ta bayyana cewa a wasan zagaye na 32 da Canada ya yi touches 92 tare da kammala fasfofi 85, mafi yawa da wani mai tsaron raga ya yi a wasan Kofin Duniya tun shekarar 1966.
Mai tsaron ragar Switzerland, Gregor Kobel, ya zo na biyu a fannin kare raga bayan ya ceci ƙwallaye 11 cikin 13 da aka harba masa, yayin da Iran ta samu wakilci ta hannun Alireza Beiranvand, wanda ya zo na uku.
Jerin Fitattun Masu Tsaron Raga na FIFA
In Possession
Vozinha (Cape Verde) – 8.03
Ronwen Williams (Afirka ta Kudu) – 7.64
Orjan Nyland (Norway) – 6.99
Matej Kovar (Czechia) – 6.97
Edouard Mendy (Senegal) – 6.79
Defending the Goal
Orlando Gill (Paraguay) – 8.26
Gregor Kobel (Switzerland) – 7.88
Alireza Beiranvand (Iran) – 7.68
Diogo Costa (Portugal) – 7.59
Benjamin Asare (Ghana) – 7.50
Vozinha ya kuma kasance na takwas a wannan rukuni da maki 7.33, abin da ya tabbatar da kasancewarsa cikin fitattun masu tsaron raga na gasar zuwa wannan mataki.