Hukumar Kula da Gina-Gine ta Jihar Legas (LASBCA) ta rushe wani katafaren gini mai benaye shida da ke kan titin Olufemi Pedro a unguwar Parkview Estate, Ikoyi, bayan gano matsalolin gine-gine masu tsanani da kuma alamun cewa ginin na dab da ruftawa.
A cewar hukumar, an dauki matakin ne domin kare rayukan jama’a da kuma kadarorin da ke kusa da ginin bayan wani bincike da jami’anta suka gudanar a yankin Ikoyi-Obalende.
Binciken ya nuna cewa ginin ya samu matsaloli masu tsanani a tushe, lamarin da ya haddasa nutsewa da kuma bayyana tsage-tsage a sassa daban-daban na ginin.
Hukumar ta ce an kuma gano alamun motsi a karkashin tushe, wanda ke nuna cewa ginin na cikin hadarin ruftawa a kowane lokaci.
Kafin rusa ginin, LASBCA ta bayyana cewa ta bi dukkan matakan doka da suka hada da bayar da sanarwar karya ka’ida, sanarwar kulle ginin da kuma sanarwar rushe shi.
An kuma ruwaito cewa an riga an kulle ginin tun da farko, yayin da jami’an hukumar suka dauki hotuna da sauran bayanan da suka dace kafin aiwatar da rushewar.
Hukumar ta kara da cewa mamallakin ko mai aikin ginin bai mayar da martani ga gargadin da aka aika masa ba kafin a dauki matakin rushewar.
Babbar Manajar LASBCA, Gbaye Florence, ta ce rushe ginin ya zama dole saboda irin hadarin da aka gano a cikinsa.
Ta bayyana cewa matakin ya taimaka wajen kaucewa yiwuwar ruftawar ginin wanda zai iya janyo asarar rayuka da lalacewar kadarorin da ke makwabtaka da shi.
Hukumar ta kuma sake jaddada kudirinta na tabbatar da tsaron jama’a tare da gargadin masu gine-gine da su bi ka’idojin da suka dace kuma su samu dukkan amincewar hukumomi kafin fara ayyukan gini.
LASBCA ta tabbatar da cewa za ta ci gaba da sanya ido kan gine-ginen da ke fadin jihar domin hana aukuwar hadurran ruftawar gine-gine da kare rayukan mazauna jihar.