Wata kotu a Birtaniya ta samu wasu maza biyu da laifin hada baki wajen kai hare-haren kona gidaje da mota masu alaka da Firaministan kasar, Keir Starmer.
Kotun Old Bailey da ke birnin Landan ta yanke hukuncin cewa Roman Lavrynovych mai shekaru 22 da Stanislav Carpiuc mai shekaru 27 sun aikata laifin lalata dukiyoyi ta hanyar kona su da wuta.
Rahotanni sun nuna cewa hare-haren sun faru ne a watan Mayun shekarar 2025, inda aka kai farmaki gidaje biyu da ke yankin Kentish Town na arewacin Landan da kuma wata mota kirar Toyota da aka ce Firaministan ya taba mallaka.
Masu gabatar da kara sun bayyana cewa maharan sun banka wa kofar gidajen wuta, lamarin da ya jefa rayukan mazauna cikin hadari. An kuma gano cewa an dauki hayar maharan ne ta manhajar Telegram daga wani mutum mai suna “El Money”, wanda ake zargin yana amfani da harshen Rasha.
Binciken kotu ya nuna cewa manufar maharan ba ta siyasa ba ce, illa neman kudi. Sai dai jami’an yaki da ta’addanci sun ce wanda ya shirya harin na son haifar da tsoro da firgici a tsakanin jama’a.
Roman Lavrynovych, dan asalin Ukraine, ya kara fuskantar hukuncin wasu laifuka biyu na kona kadarori tare da jefa rayuka cikin hadari. An kuma bayyana cewa ya dauki hotunan wuraren bayan kai harin.
Shi kuwa Stanislav Carpiuc, dan kasar Romania, an ce ya taka muhimmiyar rawa wajen tsara yadda za a gudanar da harin tare da kula da batun biyan kudade.
Wani mutum na uku da ake tuhuma a shari’ar kuwa kotu ta wanke shi daga zargin hada baki wajen aikata laifin.
Jami’an shari’a sun bayyana cewa wadannan hare-hare sun kasance masu hatsari matuka kuma sun jefa rayukan jama’a cikin barazana. Ana sa ran kotun za ta yanke hukuncin daurin wadanda aka samu da laifin a ranar Juma’a.
Lamarin ya janyo cece-kuce a Birtaniya tare da kara nuna damuwa kan hare-haren da ke shafar manyan jami’an gwamnati da muhimman kadarori.