Bartomeu ya ce bayan Neymar ya bar Barcelona zuwa PSG a watan Agustan 2017, sun samu bayanai cewa wata ƙungiya na shirin biyan kudin sakin Messi (€400m release clause) domin ɗauke shi.
Sai dai ya ce nan take suka dauki mataki domin hana hakan faruwa, inda suka tattauna da Messi da mahaifinsa tare da sabunta kwantiraginsa.
“Mun zauna da Messi da mahaifinsa, sannan muka ba shi sabon kwantiragi tare da kara kudin sakin sa zuwa €700m,” in ji Bartomeu.
Ya kara da cewa an kammala wannan yarjejeniya ne a watan Nuwamba 2017.
DALILIN KARA KUDIN
A cewarsa, Barcelona ba ta son rasa Messi a kowane hali, musamman ganin cewa an biya €222m domin sayen Neymar, wanda hakan ke nuna cewa wasu kungiyoyi za su iya biyan €400m domin Messi.
“Idan an iya biyan €222m kan Neymar, to za a iya biyan €400m kan Messi. Don haka ba mu so mu rasa shi ko ta yaya,” ya bayyana.
MUHIMMANCIN MESSI
Bartomeu ya jaddada cewa albashin da aka ba Messi a lokacin ya dace da irin gudummawar da yake bayarwa ga kungiyar, a ciki da wajen fili.