World Bank tare da haɗin gwiwar sauran bankunan ci gaba na duniya da hukumomin bayar da kudade, ta kaddamar da sabon shiri mai suna ‘Water Forward’, wanda ke da burin inganta samar da ruwan sha ga mutane biliyan 1 a duniya zuwa shekarar 2030.
Shirin, wanda aka tsara domin daidaita sauye-sauyen manufofi, hanyoyin samar da kudade, da haɗin gwiwar kasa da kasa, zai taimaka wajen inganta samun ruwa mai inganci tare da ƙarfafa juriya ga fari da ambaliya—abubuwan da ke shafar ci gaban tattalin arziki da samar da ayyukan yi.
A cikin sanarwar da aka fitar, Bankin Duniya ya jaddada muhimmancin ruwa a ci gaban duniya, yana mai cewa yana da tasiri kai tsaye a fannonin lafiya, abinci, makamashi da aikin yi.
“Ruwa shi ne ginshikin lafiya, tsarin abinci, makamashi, da kusan ayyuka biliyan 1.7 a duniya; amma mutane biliyan 4 na fama da ƙarancin ruwa,” in ji sanarwar.
Bankin ya kuma bayyana cewa akwai matsaloli da dama da ke hana ci gaba a fannin, ciki har da raunin tsarin mulki da rashin ingancin hukumomin ruwa a ƙasashe da dama.
A karkashin shirin Water Forward, Bankin Duniya zai taimaka wa ƙasashe wajen aiwatar da sauye-sauye da za su inganta tsarin ruwa, ƙarfafa cibiyoyi, da kuma jawo masu zuba jari.
Shugaban Ajay Banga ya bayyana cewa shirin zai haɗa gwamnatoci, bankunan ci gaba, kungiyoyin agaji da kamfanoni masu zaman kansu domin hanzarta samar da ruwa mai inganci a duniya.
Ya kuma ce Bankin Duniya na da burin kai wa mutane miliyan 400 ruwa mai inganci kai tsaye zuwa shekarar 2030, yayin da haɗin gwiwar shirin zai faɗaɗa tasiri zuwa sama da mutane biliyan 1 a duniya.
Rahoton ya kuma nuna cewa ƙasashe 14 sun riga sun fara aiwatar da yarjejeniyar ruwa ta ƙasa a karkashin shirin, yayin da ake sa ran ƙarin ƙasashe za su shiga nan gaba.