Inter Miami CF ta sanar da nadin Guillermo Hoyos a matsayin sabon kocinta, bayan murabus din Javier Mascherano wanda ya ajiye mukaminsa saboda dalilai na kansa.
An bayyana Hoyos a ranar Laraba, inda a taron manema labarai na farko ya bayyana cewa dangantakarsa ta dogon lokaci da Lionel Messi ba za ta hana shi bukatar cikakken kokari daga tauraron dan wasan ba a horo da wasanni.
Dan kasar Argentina mai shekaru 62 ya taba aiki a matsayin daraktan wasanni na kungiyar, kuma yanzu ya karbi ragamar horar da ‘yan wasan bayan nasarar da kungiyar ta samu ta MLS Cup a karkashin Mascherano, watanni hudu da suka wuce.
Hoyos ya bayyana cewa dangantakarsa da Messi ta samo asali ne tun sama da shekaru 20 da suka gabata, lokacin da yake horar da shi a matakin matasa a FC Barcelona.
Ya ce:
“Abota ba ta canzawa. Muna da alaƙa mai ƙarfi tun shekaru da dama. Amma hakan ba yana nufin za mu rika zagaye shi ko kasancewa a jikinsa kullum ba.”
Ko da yake sanarwar farko ta kulob din ta nuna cewa zai rike mukamin na wucin gadi, sabbin bayanai sun fara nuna cewa an nada shi a matsayin koci na dindindin har zuwa tsakiyar shekara kafin sabon tsarin horarwa da za a kaddamar kafin gasar Leagues Cup a watan Agusta.
Major League Soccer kungiyarta Inter Miami tana matsayi na uku a rukunin Eastern Conference bayan wasanni bakwai, yayin da Messi ke ci gaba da kasancewa ginshikin kungiyar.