Gasa mai zafi tsakanin kungiyoyin Turkiyya, Galatasaray da Fenerbahçe, na shirin kara tsananta a kasuwar sayen ‘yan wasa ta bazara, yayin da kungiyoyin biyu ke zawarcin dan wasan gaba na Najeriya, Tolu Arokodare.
Rahotanni daga kwararren mai bibiyar kasuwar ‘yan wasa, Ekrem Konur, sun bayyana cewa kungiyoyin biyu na son daukar dan wasan ne a matsayin aro (loan) bayan karewar kakar wasa.
Arokodare mai shekaru 24 ya koma Wolverhampton Wanderers a bara daga KRC Genk, amma rayuwarsa a Ingila ba ta tafi yadda ake fata ba.
Kungiyar Wolves na fuskantar mummunar kaka, inda take kasa a teburin gasar Premier League, kuma ana hasashen za ta fadi zuwa gasar Championship.
Saboda haka, ana ganin Arokodare zai nemi barin kungiyar domin ci gaba da taka leda a matakin koli, maimakon buga wasa a mataki na biyu.
Galatasaray da Fenerbahçe na ganin dan wasan a matsayin karin karfi ga bangaren harinsu, musamman saboda tsawonsa, karfinsa da kuma saurin sa.
Duk da haka, kwantiragin Arokodare da Wolves zai kare ne a shekarar 2029, wanda ke bai wa kungiyar damar tsara yarjejeniya mai anfani, ciki har da yiwuwar saka sharadin saye bayan aro.
Ba su kadai ba ne a wannan takara, domin Beşiktaş ita ma ta nuna sha’awar dan wasan, lamarin da ka iya janyo gasa tsakanin manyan kungiyoyin uku na Istanbul.
Yayin da Wolves ke shirin sayar da wasu ‘yan wasa sakamakon yiwuwar faduwa daga gasar, ana sa ran takarar neman Arokodare za ta kara zafi a watanni masu zuwa