Ƙungiyar Arsenal na shirin sauraron tayin sayen matasan ‘yan wasanta Ethan Nwaneri da Myles Lewis-Skelly a lokacin kasuwar musayar ‘yan wasa ta bazara, inda ake sa ran farashinsu zai kai kusan fam miliyan 100 (£100m) a haɗe.
Duk da cewa sun fito daga makarantar horar da matasa ta kulob ɗin, ‘yan wasan biyu sun sha wahala wajen samun gurbin farawa a kai a kai a filin wasa na Emirates.
Lewis-Skelly ya rasa matsayinsa na hagu (left-back) bayan zuwan Riccardo Calafiori, yayin da Nwaneri aka tura aro zuwa kulob ɗin Marseille a watan Janairu.
Sai dai zaman aron Nwaneri bai tafi yadda ake so ba, domin ya fuskanci matsalar rashin form, kuma bai samu zama cikakken ɗan wasa a kulob ɗin ba.
Haka kuma, korar kocin ƙungiyar Roberto De Zerbi ta ƙara dagula masa al’amura, inda hakan ya sa damar buga wasa ta ragu sosai.
Duk da haka, har yanzu ‘yan wasan biyu na jan hankalin kungiyoyi da dama. Kasancewarsu ‘yan makarantar kulob yana nufin duk kuɗin da za a samu daga sayar da su zai zama riba kai tsaye ga Arsenal.
Rahotanni sun nuna cewa kungiyoyin Firimiya da ke saman teburi na sha’awar Lewis-Skelly, yayin da Nwaneri ke samun kulawa daga kungiyoyi a Ingila da kuma Borussia Dortmund.
Arsenal na fatan samun kusan fam miliyan 100 daga sayar da ‘yan wasan biyu, wanda zai iya taimaka musu wajen sake gina ƙungiyar kafin sabuwar kakar wasa