Ministan Tsaro, Janar Christopher Musa (mai ritaya), ya umarci jami’an tsaro da kada su jira wani umarni kafin su dauki mataki kan ‘yan bindiga da ‘yan ta’adda, yana mai gargadin cewa duk jami’in da ya ki daukar mataki da sunan jiran umarni za a dauke shi tamkar mai hada kai da miyagu.
Musa ya bayyana hakan ne a Jihar Sokoto yayin kaddamar da motocin aiki guda 62 da sauran kayan aikin tsaro da gwamnatin jihar ta sayo kan kudi sama da naira biliyan 27 domin karfafa yaki da matsalolin tsaro.
Ya yabawa Gwamnan Jihar Sokoto, Ahmed Aliyu, bisa ci gaba da tallafa wa jami’an tsaro da motocin aiki da sauran kayan aiki, yana mai cewa hakan na nuna jajircewa wajen kare rayuka da dukiyoyin al’umma.
Ministan ya kuma bukaci jami’an tsaro su kula da kayan aikin da aka ba su tare da amfani da su yadda ya kamata, saboda an kashe makudan kudade wajen samar da su.
Sai dai ya gargadi jami’an da su guji cin zarafin jama’a ko karbar rashawa, yana mai jaddada cewa aikinsu shi ne kare fararen hula tare da murkushe ‘yan bindiga da ‘yan ta’adda.
A nasa bangaren, Gwamna Ahmed Aliyu ya bayyana cewa gwamnatin jihar ta kashe sama da naira biliyan 27 wajen sayen motocin sulke, babura, rigunan kariya daga harsasai, na’urorin hangen dare da sauran kayan aikin tsaro.
Ya kuma ce tun bayan hawansa mulki, gwamnatin jihar ta kashe sama da naira biliyan 36 wajen inganta harkokin tsaro, tare da gabatar da kudirin doka da zai tsaurara hukunci ga masu ba ‘yan bindiga bayanan sirri.
Gwamnan ya bukaci mazauna jihar su ci gaba da bai wa jami’an tsaro sahihan bayanai, yana mai cewa tabbatar da tsaro nauyi ne da ya rataya a wuyan kowa.