Hukumar Kula da Wutar Lantarki ta Najeriya (NERC) ta bayyana cewa Kamfanonin Rarraba Wutar Lantarki (DisCos) sun tattara Naira biliyan 203.61 daga hannun masu amfani da wutar lantarki a watan Afrilu 2026.
Hukumar ta bayyana hakan ne a cikin rahoton Commercial Performance Factsheet na watan Afrilu da ta wallafa a shafinta na X.
Rahoton ya nuna cewa DisCos 11 sun yi wa kwastomomi lissafin kuɗin wuta da ya kai Naira biliyan 252.43, inda suka samu nasarar karɓar Naira biliyan 203.61, wanda ya nuna ingancin karɓar kuɗi (Collection Efficiency) ya kai kashi 80.66%.
A cewar NERC, kamfanonin sun karɓi wutar lantarki da darajarta ta kai Naira biliyan 302.96, sannan suka yi wa abokan hulɗarsu lissafin kuɗi na Naira biliyan 252.43.
Rahoton ya nuna cewa ingancin karɓar kuɗi ya ƙaru da kashi 1.07% idan aka kwatanta da watan da ya gabata.
Sai dai ingancin yin lissafin kuɗin wuta (Billing Efficiency) ya ragu kaɗan zuwa kashi 83.32%, wanda ya nuna raguwar kashi 0.57% idan aka kwatanta da watan da ya gabata.
Hukumar ta kuma bayyana cewa ingancin dawo da kuɗaɗen shiga (Revenue Recovery Efficiency) na masana’antar ya kai kashi 82.11%, inda matsakaicin kuɗin da aka karɓa ya kasance N102.13 kan kowace kilowatt-hour (kWh), idan aka kwatanta da farashin da aka amince da shi na N124.39/kWh.
Rahoton ya nuna cewa Eko DisCo ce ta fi kowa ƙwarewa wajen dawo da kuɗaɗen shiga da kashi 102.09%, sai Abuja DisCo da kashi 89.77%, sannan Ikeja DisCo da kashi 88.89%.
NERC ta ce waɗannan kamfanoni ne suka fi sauran DisCos wajen samun nasarar dawo da kuɗaɗen shiga a watan Afrilu.