Dan wasan gaba na Trabzonspor, Paul Onuachu, ya lashe kyautar takalmin zinariya ta gasar Süper Lig ta Turkiyya na kakar 2025/2026 bayan ya zama wanda ya fi kowa zura kwallaye a gasar.
Dan wasan na Najeriya ya yi bajintar da ta dauki hankali, inda ya kammala kakar da kwallaye 22 a gasar lig, abin da ya ba shi nasarar zama gwarzon mai cin kwallaye.
Hukumar Kwallon Kafa ta Najeriya (NFF) ta taya Onuachu murna ta shafinta na X, inda ta yaba da irin kokarin da ya nuna a duk kakar wasan.
NFF ta bayyana cewa: “Paul Onuachu ya kasance babban jarumi, inda ya zura kwallaye 22 a gasar Süper Lig bana.”
Kwarewarsa da iya cin kwallaye a wasanni masu muhimmanci ne suka tabbatar da nasararsa a karshen kakar.
A baya da shi akwai Eldor Shomurodov na İstanbul Başakşehir da ya ci kusan kwallaye 21, yayin da Anderson Talisca na Fenerbahçe ya biyo baya da kwallaye 19.
Shi kuwa Victor Osimhen na Galatasaray ya kammala kakar da kwallaye 15 kacal, lamarin da ya sa bai shiga cikin ukun farko ba duk da irin rawar da ya taka.
Nasarar Onuachu ta tabbatar da shi a matsayin daya daga cikin fitattun ‘yan wasan Najeriya da ke taka rawar gani a Turai.