Robot ɗin da aka ƙera yana da hannu mai amfani da fasahar AI wanda ke riƙe da bat, kuma yana iya gani, fahimta, da mayar da martani cikin sauri ga ƙwallon ping-pong mai saurin tafiya da juyawa.
Kamfanin Sony AI ya bayyana cewa Ace wani babban robot ne mai girman kusan teburin ping-pong, amma yana da ikon yanke hukunci cikin daƙiƙa da yin motsi cikin sauri da ƙarfi.
A gwaje-gwajen da aka yi, robot ɗin ya fafata da ’yan wasa ƙwararru guda biyar da kuma wasu ƙwararrun ‘yan wasa biyu.
Rahoton ya nuna cewa Ace ya yi nasara a wasanni uku cikin biyar da ya buga da ƙungiyar ƙwararru, yayin da sauran wasannin suka kasance masu tsauri da kusanci.
Kamfanin ya ce robot ɗin yana ci gaba da inganta ƙwarewarsa ko bayan an gabatar da binciken a mujallar Nature. A wasu sabbin wasanni, ya fara doke ƙwararru da ƙarin saurin bugawa, dabarar jefa ƙwallo kusa da gefen tebur, da kuma saurin musayar ƙwallo.
Sony AI ya bayyana cewa wannan ci gaba zai taimaka wajen ƙirƙirar tsarin AI da zai iya aiki cikin muhalli mai motsi da sauyin yanayi cikin aminci da daidaito.
A baya, an riga an ƙera wasu robot masu iya yin ping-pong, amma ba su taɓa kaiwa matakin ƙwararrun ’yan wasa ba.
Peter Stone, babban masanin kimiyya a Sony AI, ya ce idan AI ya kai matakin ƙwarewar ɗan adam a irin wannan fanni, zai buɗe sabbin damammaki na amfani da fasaha a aikace-aikacen rayuwa ta yau da kullum.