Ɗan takarar shugaban ƙasa na jam’iyyar Nigeria Democratic Congress (NDC), Peter Obi, ya bayyana cewa yana girmama Shugaban Ƙasar Najeriya, Bola Ahmed Tinubu, yana mai cewa ba zai taɓa amfani da zagi ko cin mutunci wajen sukar shugaban ko wani ɗan siyasa ba.
Obi ya bayyana hakan ne a ranar Juma’a yayin taron 2026 All Nigeria Editors’ Conference, wanda aka gudanar a Enugu, ƙarƙashin taken “The Ballot, the Media and the Task of Keeping Democracy Alive” — wato zaɓe, kafafen yaɗa labarai da kuma aikin kiyaye dimokuraɗiyya.
Tsohon gwamnan Jihar Anambra ya yi wannan jawabi ne yayin da yake magana kan batutuwan da suka shafi bashin jihar da kuma muhimmancin tabbatar da yin hisabi da gaskiya a harkokin mulkin jama’a.
Obi ya ce rashin jituwa tsakanin ‘yan siyasa bai kamata ya koma batun cin mutunci ko kai wa juna hari ba, inda ya jaddada cewa ya kamata muhawara ta fi karkata ne kan manufofi, yadda ake tafiyar da gwamnati da kuma sakamakon ayyukan shugabanni.
Ya ce ba ya ganin dalilin da zai sa ya zagi wani gwamna ko wani jami’in gwamnati, yana mai cewa girmama shugaban ƙasa wani abu ne da ya kamata a kiyaye duk da bambancin ra’ayi.
“Ba zan zagi wani gwamna ba. Ba zan zagi kowa a gwamnati ba. Ba na bukatar in zagi mutane, har ma da waɗanda ke gwamnatin tarayya. Ban taɓa zagin kowa ba. Wa ya taɓa ganina ina kiran sunan Shugaba Tinubu ina zaginsa? Babu! Ba zan yi hakan ba. Shi ne Shugaban ƙasar, kuma yana da dukkan girmamawata,” in ji Obi.
Sai dai Obi ya ƙara da cewa girmama shugabanni ba yana nufin cewa ‘yan ƙasa ko kafafen yaɗa labarai su daina bincike da tambayar shugabanni kan yadda suke gudanar da ayyukansu ba.
A cewarsa, ana iya sukar manufofi ko ayyukan gwamnati idan ana ganin ba su dace ba, matuƙar ba a mayar da sukar zuwa cin mutunci ko zagi ba.
“Amma zan iya yin magana kan wasu batutuwa, ko kana yin abin da ya dace ko kuma ba ka yin abin da ya dace. Hakan ya halatta,” in ji shi.
Obi ya kuma bayyana cewa ɗabi’a da halayen shugabanni na iya yin tasiri wajen gina ko sauya dabi’un al’umma, saboda shugabanni na daga cikin mutanen da al’umma ke kallon halayensu a matsayin abin koyi.
Ya yi kira ga editocin kafafen yaɗa labarai da su ci gaba da bincikar shugabannin siyasa bisa la’akari da tarihin ayyukansu, kalaman da suke furtawa da kuma cancantarsu, domin tabbatar da cewa ana riƙe da shugabannin gwamnati bisa ƙa’idojin yin hisabi.
“Dole ne mu yi hakan, saboda shugaba, halaye da ɗabi’ar shugaba suna wakiltar darajar al’umma. Kuma dole ne shugaba ya rayu da wannan darajar,” in ji Obi.
Obi ya jaddada cewa dimokuraɗiyya na buƙatar damar yin tambaya da suka kan ayyukan gwamnati, tare da kiyaye mutunci da martabar waɗanda ke riƙe da mukaman gwamnati.