Gwamnatin Cuba ta yi kakkausar suka ga kalaman Shugaban Amurka, Donald Trump, bayan ya bayyana a Majalisar Ɗinkin Duniya cewa ƙasar Cuba za ta faɗi.
Ministan Harkokin Wajen Cuba, Bruno Rodriguez, ya mayar da martani ne a ranar Talata, inda ya zargi Trump da yaɗa bayanan ƙarya, tare da jaddada cewa ƙasarsa ƙasa ce mai cikakken ’yancin kai.
Martanin na zuwa ne bayan tawagar Cuba ta fice daga zauren Majalisar Ɗinkin Duniya a birnin New York, yayin da Trump ke gabatar da jawabinsa a babban taron Majalisar Ɗinkin Duniya karo na 81.
Rodriguez ya bayyana a shafinsa na X cewa gwamnatin Amurka ta ƙi amincewa da haƙƙin Cuba na kasancewa ƙasa mai cikakken ’yancin kai da ikon cin gashin kanta.
Ya ƙara da cewa Cuba ƙasa ce mai son zaman lafiya, kuma al’ummarta sun cancanci rayuwa cikin zaman lafiya.
Shi ma Shugaban Cuba, Miguel Diaz-Canel, ya yi Allah-wadai da kalaman Trump, yana mai zargin shugaban Amurka da maimaita ikirarin cewa Cuba na barazana ga tsaron ƙasarsa.
Diaz-Canel ya ce Amurka ba ta da hujjar da za ta tabbatar da matakan matsin lambar tattalin arziki da take ɗauka kan al’ummar Cuba, yana mai bayyana cewa ƙaryar da ake yaɗawa na ƙoƙarin tauye haƙƙin al’ummar ƙasar na cin gashin kansu.
Rahoton ya ce gwamnatin Trump ta kakaba takunkumin makamashi kan Cuba tun watan Janairun 2026, tare da ƙara wasu matakan matsin lamba tun daga lokacin.
Trump ya kuma sha bayyana Cuba, wadda ke da tazarar kusan kilomita 150 daga gabar jihar Florida ta Amurka, a matsayin babbar barazana ga tsaron ƙasarsa.
Sai dai shugabannin Cuba sun ci gaba da ƙin amincewa da wannan matsaya, suna mai jaddada ikon ƙasarsu na cin gashin kanta da kuma haƙƙin al’ummarta na yanke makomarsu.